Financial Times маълумотига кўра, Европа Иттифоқи Россияга қарши иқтисодий босимни кучайтириш учун ҳуқуқий асосни ўзгартириш йўли билан санкциялар миқёсини сақлаб қолишга ҳаракат қилмоқда. Бу, хусусан, Венгриянинг вето қўллаш эҳтимолини бартараф этишга қаратилган. Янги механизмлар орқали Европа Комиссияси музлатилган Россия активларини, тахминан 200 млрд евро миқдорида, ҳаракатсиз ҳолда ушлаб туришни режалаштирмоқда.
Манбаларга кўра, санкцияларнинг айрим қисмлари «муқобил юридик асос»га ўтказилиши мумкин. Бу усул Евроиттифоқнинг барча 27 аъзосининг якдил овозини талаб қилмайди — кўпчилик овози етарли бўлади. Европа мансабдорларидан бири бу «А режа»га асосий эътибор қаратилаётганини, бироқ бошқа ҳуқуқий вариантлар ҳам муҳокама қилинаётганини маълум қилган.
Венгрия бош вазири Виктор Орбан аввал ҳам Москвага нисбатан санкциялар жорий этишга халақит беришга уриниб келган. Жорий йил июл ойи охирида амалдаги чекловлар муддати тугайди ва Орбан яна уларни узайтиришга қарши чиқиши мумкин. Бироқ Евроиттифоқ элчилари йиғилишида Будапешт томонидан жиддий эътироз билдирилмаган.
Шу билан бирга, Европа Иттифоқи Россиядан бойитилган уран импортига тарифлар ва янги газ шартномаларига тўлиқ тақиқ қўйиш имкониятини ҳам кўриб чиқмоқда. Бу чоралар расмий равишда «санкция» деб аталмаслиги мумкин, бу эса юридик тўсиқларни камайтиради.
Январда Евроиттифоқ Россия ва Беларусдан ўғитлар импортига тариф жорий қилган эди. Бу тажриба ҳозирги ечимлар учун прецедент бўлиб хизмат қилмоқда.
Европа Иттифоқи Россияни муваққат тинчликка мажбурлаш учун сиёсий босим билан бирга иқтисодий фаолиятни ҳам янги форматда давом эттирмоқда.