Россия президенти Владимир Путин Украина ва унинг Ғарбдаги ҳамкорларининг 30 кунлик оташкесим ҳақидаги таклифига жавоб беришга мажбур бўлди, деб ҳисоблайди сиёсатшунос Владимир Фесенко. Аммо бу жавоб аслида Европа ёки Украина учун эмас, балки АҚШдаги сиёсий жараёнлар, хусусан, Доналд Трампнинг эътиборини жалб қилишга қаратилган. Фесенко сўзларига кўра, Путин Истанбулни музокаралар майдони сифатида таклиф этиш орқали 2022 йилдаги дастлабки учрашувларни эслатмоқчи — ўшанда Кремл Украинадан деярли таслим бўлишни талаб қилган эди.
Таҳлилчиларнинг фикрича, Путин Украинага бирйўла қўштузоқ қўймоқда: Киев музокаралардан бош торта олмайди, лекин Россия шартларини қабул қилиш ҳам унинг манфаатига зид. Шунинг учун расмий Киев музокаралар формати ва таркиби бўйича фаол ташаббус кўрсатиши керак.
«Гап бутун Европа хавфсизлиги ҳақида кетмоқда, шундай экан, музокаралар кенг қамровли бўлиши зарур», — дейди «Украина меридиани» маркази раҳбари Дмитрий Левус.
«Украинска призма» таҳлил маркази вакили Александр Краев эса агар Истанбулдаги музокаралар самара бермаса, Доналд Трамп орқага чекина олмайди, деб ҳисоблайди. Унга кўра, Америка президенти бу жараёнга жуда кўп сиёсий капитал тикиб бўлган ва энди натижа кўрсатиши шарт — акс ҳолда у ожиз сиёсий етакчи сифатида қабул қилина бошлаши мумкин.