Франция президенти Эммануэль Макрон 13 май куни TF1 телеканалидаги чиқишида Франция Украина армиясини мустаҳкамлашни давом эттиришини билдирди. Унга кўра, тинчлик келишуви тузилгандан сўнг Киев хавфсизлигининг биринчи кафолати айнан кучли армия бўлади.
Макрон Украина НАТОга аъзо бўлмаслигини таъкидлар экан, Франция ва иттифоқчилар фронтдан узоқ ҳудудларда тинчликпарвар кучларини жойлаштиришни таклиф этди. Бу қадам Украинага қатъий ҳамдардлик белгиси ва Россияни янги ҳужумдан қайтариш воситаси сифатида кўрилаётганини айтди.
Шу билан бирга, Франция раҳбари Ғарб мамлакатларини эҳтиёткорликка чақириб, Украинага ёрдам кўрсатар экан, «учинчи жаҳон урушини келтириб чиқариш хавфидан сақланиш»ни муҳим деб ҳисоблашини билдирди.
Макрон, шунингдек, Украина барча босиб олинган ҳудудларни қайтариб олиши имконсизлигини айтди. Унинг таъкидлашича, Киев тинчлик музокараларига тайёргарлик кўриши керак, ва ҳудудлар масаласи ана шунда ҳал этилади.
Франция президенти уруш тугагач, Россия активларини фақат қонуний асосда Украинага ўтказиш мумкинлигини таъкидлади. Ҳозирча эса бунинг ҳуқуқий механизмлари мавжуд эмас.
Макрон Москва 30 кунлик оташкесимга рози бўлмаса, Франция яқин кунларда янги санкциялар жорий этишини маълум қилди. Бу «иккиламчи санкциялар» асосан SWIFT тизимидан чиқарилмаган банклар ва Россияга молиявий хизмат кўрсатувчи учинчи давлат молия муассасаларига қаратилган бўлади. Шунингдек, йирик Россия нефт компанияларига ҳам чекловлар жорий этилиши кутилмоқда.