Forbes хабарига кўра, Microsoft компанияси 2025 молиявий йилида сунъий интеллектга қаратиладиган йирик сармоялар фонида умумий ходимлар сонининг 3 фоизини ташкил этувчи 7 минг нафар ходимни ишдан бўшатишини маълум қилди. Reutersʼнинг хабар беришича, бу қарор сунъий интеллект технологияларининг ўзидан кўра, компаниянинг янги AI ташаббусларига йўналтирилган сармоялари билан боғлиқ.
Microsoft раҳбари Сатя Наделла компанияни «AI дистилляция заводи» деб атаб, компания катта тил моделларини ихтисослаштирилган ҳамда вазифага йўналтирилган моделларга айлантиришни мақсад қилганини таъкидлаган. У AI’ни «демократиялаштириш» концепцияси орқали барча соҳа ва одамларга етказишга интилмоқда.
Microsoft AI қобилиятларини ўзининг асосий маҳсулотларига — Microsoft 365, Azure ва Dynamics365 — кенг жорий қилмоқда. Бу орқали компания корпоратив мижозларга йўналтирилган қулай AI платформаларини тақдим этишни кўзламоқда.
Молия бозори бу стратегияни ижобий қабул қилди. Компаниянинг акциялари 2025 йилда 449,26 долларгача кўтарилди — бу йилдаги энг юқори кўрсаткичлардан бири. Қўшимча равишда, Microsoft 70,07 млрд доллар миқдоридаги чораклик даромадни эълон қилди ва аналитикларнинг прогнозларидан ошиб тушди. AI соҳасига келгуси молия йилида 80 млрд доллар сармоя киритилиши режалаштирилган.