Украина президенти Володимир Зеленский 13 май куни Истанбулда бўлиб ўтиши кутилган Россия–Украина музокаралари арафасида Кремл раҳбари Владимир Путин билан тўғридан-тўғри учрашувга интилаётганини маълум қилди. Унга кўра, оташкесим фақат Путин билан тузиладиган келишув орқали амалга оширилиши мумкин.
Зеленскийнинг таъкидлашича, Путиннинг шахсан учрашувга келишга рози бўлиши урушни тўхтатишга ҳақиқий хоҳиши борлигини кўрсатади. «Агар у фақат ОАВ орқали эмас, балки реал ҳаётда ҳам учрашувга тайёр бўлса, биз келишувга эришамиз», — деди у.
Украина раҳбари Истанбул музокараларига АҚШ президенти Доналд Трампни ҳам таклиф этганини маълум қилди. Унинг сўзларига кўра, Трамп иштирок этишини тасдиқласа, бу Путинни келишга янада рағбатлантириши мумкин.
Шунингдек, Зеленский Путин музокарага келмаса, бу Россиянинг урушни тугатиш нияти йўқлигини расман тасдиқлайди, дея таъкидлади. У Ғарб давлатларини бундай ҳолатда «энг кучли санкциялар пакетини» жорий этишга чақирди. «Бу санкциялар агрессия учун эмас, тинчликни рад этиш учун бўлади», — деди у.
Кремл бу баёнотларга жавоб бермади. Президент матбуот котиби Дмитрий Песковнинг маълум қилишича, Россия музокараларга тайёргарликни давом эттирмоқда, лекин делегация таркиби ва бошқа тафсилотлар фақат Путин лозим деб ҳисобласа, эълон қилинади.