15 май куни Истанбулда Украина ва Россия делегациялари ўртасида навбатдаги музокаралар ўтказилиши керак. Бироқ Кремл ушбу учрашувга на президент Владимир Путинни, на ташқи ишлар вазирини юбормоқда. 2022 йилнинг апрелидаги Истанбул музокараларида бўлгани каби Россия делегациясига президент ёрдамчиси Владимир Мединский бошчилик қилади.
Бу ҳолат Украина президенти Владимир Зеленскийнинг кескин муносабатига сабаб бўлди.
The Washington Post манбаларига кўра, Зеленский дастлаб музокараларда иштирок этишдан тўлиқ бош тортиш ниятида бўлган — ўзи ҳам бормайди, делегация ҳам юбормоқчи бўлмаган. Аммо АҚШ ва Европа Иттифоқи раҳбарлари уни бу фикрдан қайтади. Хусусан, АҚШнинг махсус вакили Стивен Уиткофф шахсан уни ишонтириб, Истанбулга ташқи ишлар вазири ва Президент офиси раҳбаридан иборат делегация юбориш зарурлигини таъкидлаган.
Аввалроқ турли манбалар Вашингтон агар музокарага Россия делегацияси келмаса, янги санкциялар жорий қилишга тайёрлигини маълум қилган эди.
Зеленский эса ҳали ҳам Путин билан юзма-юз суҳбатга эришиш ниятида. Бугун у Анқарада Туркия президенти билан учрашув ўтказиши кутилмоқда.
Кеча кечқурун Россия делегацияси таркиби эълон қилинганидан сўнг АҚШ президенти Доналд Трамп Туркияга бормаслигини расман эълон қилди.