Politico нашрининг ёзишича, Европа Иттифоқи раҳбарлари Россия экспортига нисбатан қаттиқроқ чекловлар жорий этиш масаласини кўриб чиқмоқда.
Жума куни Албания пойтахти Тиранада Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Украина президенти Володимир Зеленский ва Туркия президенти Ражаб Тоййиб Эрдўған иштирокида учрашув бўлиб ўтди. Тўрт европалик расмийнинг маълум қилишича, учрашувдаги асосий мавзулардан бири Россияга қарши янги санкциялар бўлади.
Хусусан, Россиядан келадиган товарларга жорий этилиши мумкин бўлган жарима божлари муҳокама қилинмоқда. Бу таклиф Европа Иттифоқининг Венгрия қаршилиги туфайли тўлиқ эмбарго қўллай олмаётгани сабабли илгари сурилмоқда. Икки манбанинг таъкидлашича, бундай чора Венгрия ветосини чеклаш имконини беради.
Маълум қилинишича, АҚШ сенатори Линдси Грэҳэмнинг Россия импортига 500 фоизлик божлар жорий этиш таклифи Европада «жазоловчи тарифлар»ни муҳокама қилишга илҳом берган.
Саммит арафасида Европа Иттифоқи мамлакатлари элчилари Россиянинг қарийб 200 та нефт ташувчи кемаларидан иборат «хуфёна флоти»га қарши чекловларни ўз ичига олган 17-санкциялар пакетини келишиб олди.
Москва ва Киев ўртасидаги тўғридан-тўғри музокараларни ташкил этиш уриниши – 2022 йилдаги кенг кўламдаги уруш бошлангандан буён биринчи марта – натижа бермади. Володимир Зеленский Туркияга келишга тайёр бўлган бўлса-да, Путин шахсан иштирок этишни рад этди ва паст даражадаги делегацияни юборди. Бу нафaқат учрашувнинг ўтказилиш эҳтимолини, балки унинг формати ва самарадорлигини ҳам шубҳа остига қўйди.
АҚШ президенти Доналд Трамп музокараларда иштирок этишга тайёр эканини маълум қилган, бироқ Путин иштирок этмас экан, жиддий натижага эришиш қийинлигини таъкидлаган.
Буюк Британия расмийларидан бири музокаралар муваффақиятсиз тугаса, янги санкциялар ва халқаро қўллаб-қувватлашни сафарбар этиш масаласи яна кун тартибига чиқишини маълум қилган. Франция, Германия ва Полша раҳбарлари Москва тўлиқ ва шартсиз оташкесимга рози бўлмаса, кескин чоралар кўрилиши ҳақида баёнот берган. Франция ташқи ишлар вазири Жан-Ноэл Барро эса Ғарб давлатлари Россия иқтисодиётини «нафас ололмас» ҳолатга келтириши кераклигини таъкидлаб, керакли чоралар иқтисодий тизимни тубдан емирадиган даражада бўлиши лозимлигини қайд этди.