Доналд Трамп Fox News’га берган интервьюсида, Туркияда бошланган Украина-Россия музокараларига изоҳ берди. У, агар келишувга эришилмаса, АҚШ Россияга нисбатан яна санкциялар жорий қилишини айтди. «Россияда иқтисодий вазият оғир, нефт нархлари паст. Янги санкциялар улар учун ҳалокатли бўлади», — деди Трамп.
Трамп ўзини Киев ва Москва ўртасида тинчлик ўрнатишга қодир етакчи сифатида кўрсатди. У Путин билан «яхши муносабатлар»и борлигини, Россия раҳбари урушдан чарчагандек кўриниб турганини қайд этди. Шунингдек, Трамп Javelin қуроллари Украинага унинг маъмурияти даврида етказиб берилганини ва бу урушда ҳал қилувчи аҳамиятга эга бўлганини эслатди.
Европа Иттифоқи давлатлари ва АҚШ Россиядан 12 майдан 30 кунлик оташкесим талаб қилган эди. Путин бундан бош тортди ва музокараларни 15 майдан Истанбулда давом эттиришни таклиф қилди. Украина президенти Зеленский Путин билан тўғридан-тўғри учрашувга тайёрлигини билдирган, лекин Москва учрашувга Владимир Мединский бошчилигида делегация юборди.
The Economist’нинг маълум қилишича, Россия делегацияси музокараларда Харкив ва Суми областларини эгаллаш таҳдидини билдирган ҳамда Донецк, Луҳанск, Херсон ва Запорижжя областлари тўлиқ Россия назоратига ўтиши талаб қилинган. Мединский, ҳатто, Россиянинг 21 йиллик Швеция билан урушини мисол қилиб келтириб, «улар бунга тайёр»лигини айтган.
Истанбулдаги музокаралар икки соатдан кам вақт давом этди. Якка натижа — 1000 га 1000 форматида ҳарбий асирларни алмашиш ва музокараларни давом эттириш нияти бўлди.