Прокуратура баёнотига кўра, Amnesty International Лондонда жойлашган бош офис орқали «русофобик лойиҳалар»ни амалга оширган, Украинага ёрдам кўрсатишга чақирган ва Россияни сиёсий ҳамда иқтисодий жиҳатдан яккалаштиришга уринишда айбланган. Шунингдек, ташкилот «экстремистик гуруҳлар»ни қўллаб-қувватлаш ва «хорижий агентлар» фаолиятини молиялаштиришда айбланмоқда.
Amnesty International раҳбари Агнес Калламард бу қарорни Россияда фуқаролик жамиятини сукутга солишга қаратилган ҳаракат деб баҳолади ва ташкилот инсон ҳуқуқлари бузилишларини ҳужжатлаштиришни давом эттиришини маълум қилди.
Бу қарор Россияда мустақил ташкилотлар ва журналистларга нисбатан босимлар кучайган бир пайтда қабул қилинди. Ҳозирда Россиянинг «исталмаган ташкилотлар» рўйхатида 223 та ташкилот мавжуд бўлиб, улар орасида Radio Free Europe, Chatham House ва Transparency International каби халқаро ташкилотлар ҳам бор.
Amnesty International 1961 йилда ташкил этилган бўлиб, дунё бўйлаб инсон ҳуқуқларини ҳимоя қилиш ва адолатни таъминлашга қаратилган фаолият олиб боради. Ташкилот Россияда инсон ҳуқуқлари бузилишлари ва Украинадаги ҳарбий жиноятларини ҳужжатлаштириб келмоқда.