АҚШ ва Хитой ўртасидаги 90 кунлик тариф келишуви глобал музокараларда янги йўналиш яратиб, бошқа давлатларнинг ҳам АҚШ билан муносабатларига янгича ёндашув олиб келмоқда.
Ўтган ҳафта икки давлат тарифларни 145 фоиздан 30 фоизгача вақтинча туширишга келишди. Бу Пекиннинг қатъий позицияси ва Вашингтонга босимидан кейин амалга ошди. Музокараларда анча дипломатик ёндашувни танлаган Япония, Жанубий Корея ва Европа Иттифоқи бу келишувдан кейин ўз стратегик позицияларини қайта кўриб чиқмоқда.
Жанубий Корея ва Япония расмийлари энди шошма-шошарлик билан келишув тузмаслигини маълум қилди. Япония савдо вазири: «Муддатлар учун миллий манфаатлардан воз кечмаймиз», — дея баёнот берди. Европа Иттифоқи эса АҚШ ютуқларини чекланган деб баҳоламоқда.
Келишувдан хулоса чиқараётган давлатлар орасида Ҳиндистон ҳам бор. Мамлакат музокараларни давом эттирмоқда, аммо ҳали бирон тариф имтиёзига розилик бермаганини билдирди. Бу орада Канада ва Виетнам каби иқтисодиёти АҚШга боғлиқ давлатлар музокараларда анча енгилмас позицияни танламоқда.
Хитой билан тузилган келишув мамлакатнинг иқтисодий салоҳияти бор давлатларга АҚШ билан «қатъий» музокаралар олиб бориш имкони борлигини кўрсатмоқда. Бироқ бу услуб барча учун мос келмайди. Экспортга боғлиқ давлатлар учун бу йўл иқтисодий хавф-хатарларга олиб келиши мумкин.