Францияда криптовалюта соҳасида фаолият юритувчи тадбиркорлар ва уларнинг оила аъзоларига нисбатан кўпайиб бораётган тажовузлар ва ўғирлашлар мамлакат ички ишлар вазирлигини ҳам ташвишга солди. Сўнгги ойларда бештага яқин шундай ҳужум қайд этилган.
13 май куни Парижда Paymium криптобиржаси ҳаммуассиси Пиер Нуазнинг қизи ва икки ёшли набираси ўғирлашга уринилган. Тажовузчиларга қаршилик кўрсатилган ва уларнинг ҳаракати муваффақиятсиз якунланган. Бу воқеадан сўнг, 16 май куни ички ишлар вазири Брюно Ретайо криптокомпаниялар раҳбарлари билан учрашув ўтказди.
Январ ойида эса Ledger криптокошелек ишлаб чиқарувчи компаниянинг ҳаммуассиси Давид Баллан ва унинг хотини ўғирланди. Балланнинг шерикларидан 10 млн евро талаб қилинган. Бир видеода унга тажовуз қилингани, ҳатто бармоғи кесилгани акс этган. Баллан куч билан озод қилинди, хотини эса кейинчалик товон эвазига қутқарилган.
Полицияга кўра, ушбу ҳужумларнинг аксарияти Telegram ва Signal мессенжерлари орқали алоқа қиладиган ёш жиноятчилар гуруҳлари томонидан амалга оширилмоқда. Жиноятчилар қурбонларнинг шахсий маълумотларини олдиндан аниқлаб олади. Кўплаб криптофойдаланувчиларнинг маълумотлари олдинги йиллардаги маълумотлар оқиб кетишидан кейин интернетда очиқ қолган.
Шунингдек, Францияда расмий компаниялар реестрларида тадбиркорларнинг уй манзиллари кўрсатилиши, шунингдек, криптомулкдорларнинг ижтимоий тармоқлардаги фаоллиги уларни осон нишонга айлантиради.
Франциядаги бу ҳолатлар глобал тенденциянинг бир қисми ҳисобланади. 2024 йил июлида Эстонияда австралиялик криптомулкдор Тим Ҳитни ўғирлашга уриниш бўлган. АҚШнинг Флорида штатида эса криптовалютага эга бўлган фуқароларга қарши зўравонлик билан бойликни ўғирлашни мақсад қилган 12 кишидан иборат гуруҳ маҳкум этилган.