Иқтисодчи Миркомил Холбоевнинг фикрича, энергия товарлари импорти 591 млн доллар бўлиб, бир йил аввалги кўрсаткичга нисбатан 38,9 фоизга камайган. Автомобиллар импорти эса 671 млн долларни ташкил қилган ҳолда 30,7 фоизга пасайган. Бу икки сегмент умумий импорт тушишига ҳал қилувчи таъсир кўрсатган.
Бошқа томондан, хизматлар ва озиқ-овқат товарлари импортида ўсиш кузатилмоқда. Хусусан, хизматлар импорти 32,9 фоизга ўсган, шунда ҳам энг катта улуш туризм хизматларига тўғри келиб, 53 фоизга ошган. Унинг қиймати 563,8 млн долларни ташкил этди.
Хизматларсиз ҳисоблаганда, импорт 5,3 фоизга камайган. Бироқ энергия товарларисиз импорт 2,4 фоизга ошган. Бу ҳолат импорт таркибидаги ички ўзгаришлардан далолат беради.
Марказий банк маълумотларини ўрганган Миркомил Холбоевнинг таъкидлашича, биринчи чоракда реал валюта курсининг 4,9 фоизга қадрсизланиши импортни тушириши мумкин бўлган омил ҳисобланса-да, асосий таъсир нотариф тўсиқлар, автомобил ва хусусан, газ импортининг кескин камайиши орқали содир бўлмоқда.
Унинг фикрича, газ импортининг 88,3 фоизга қисқариши импорт камайишига жиддий таъсир қилган ва бу омил валюта курсидан ҳам кучлироқ таъсир кўрсатмоқда. Шу боис, импортнинг тушиши биргина курс эмас, балки ички сиёсат ва тартибга солиш омиллари билан боғлиқ экани аниқ.