21 май куни Британия Миллий статистика бошқармаси маълум қилишича, мамлакатда инфляция апрель ойида 3,5 фоизга етди. Бу кўрсаткич 2024 йил январидан бери энг юқори даража бўлиб, кутилаётган кўрсаткичлардан юқори чиқди.
Ишлаб чиқарувчи ва хусусий секторда нархлар пасайишга мойил бўлаётган бир пайтда, давлат томонидан назорат қилинадиган коммунал хизматлар, сув, энергия, темир йўл тўловлари ва маҳаллий солиқлар инфляцияни қайтадан оширди.
Кенг қамровли инфляция индекси (CPIH) эса янада юқори бўлиб, 4,1 фоизга етган. Бу кўрсаткич уй-жой билан боғлиқ харажатларни ҳам ўз ичига олади. Энергия назоратчиси Ofgem томонидан тасдиқланган электр ва газ тарифлари 6,4 фоизга ошгани асосий сабаблардан бири сифатида кўрсатилган.
Бошқа томондан, сув тўловлари ва атроф-муҳитни ҳимоя қилиш билан боғлиқ харажатлар Labour (Меҳнат партияси) ҳукумати даврида кўпроқ оширилди. Бу эса олдинги Консерватив ҳукуматдан қолган муаммоларни бартараф этиш мақсадида қилинган, деб баҳоланмоқда.
Банк Англия инфляцияни аста-секин назоратга олишини таъкидлаб келаётган бўлса-да, сўнгги маълумотлар унинг прогнозларига нисбатан ишончни пасайтирмоқда. Банкнинг бош иқтисодчиси Хью Пилл эса базавий инфляция пасайишда давом этаётганини ва асосий фоиз ставкаси келгусида яна пасайишини кутмоқда.