The New York Times нашрининг ёзишича, АҚШ президенти Доналд Трамп Украина президенти Владимир Зеленский ҳамда Европа давлатлари раҳбарларига Москва ва Киев ўртасидаги урушни тугатиш масаласини уларнинг ўзи ҳал қилиши кераклигини айтди. У бу фикрни 19 май куни Россия президенти Владимир Путин билан ўтказилган телефон суҳбатидан сўнг билдирган.
Нашр манбаларига кўра, Трампнинг ушбу баёноти унинг Россия ва Украина ўртасидаги оловсизлик музокараларидан деярли чиқиб кетганини англатади. Сиёсий муҳокамалардан хабардор бўлган олти нафар расмийнинг айтишича, Трамп ўзининг аввалги таҳдидларидан — агар Россия урушни тўхтатмаса, АҚШ Европа санкцияларига қўшилади — воз кечган.
Бир европалик юқори мартабали амалдорнинг маълум қилишича, Трамп аслида бошиданоқ Россияга нисбатан санкцияларга қўшилишга қизиқиш билдирмаган. Бу муносабат унинг ташқи сиёсатда иқтисодий манфаатларни биринчи ўринга қўяётганини кўрсатади.
Шунингдек, Оқ уй расмийларидан бири The New York Times нашрига берган маълумотда айтилишича, АҚШнинг Россияга нисбатан қўшимча санкциялари Америка бизнеси ривожига тўсиқ бўлади. Трамп эса мамлакат фуқаролари учун иқтисодий имкониятларни кенгайтиришни мақсад қилган.
Бу баёнот Европа билан муносабатларда анча мураккаб вазиятни юзага келтириши мумкин. Европа Иттифоқи Россияга нисбатан янги санкциялар жорий этиш ҳаракатида бўлса, АҚШ бу жараёндан четда қолишга мойиллик кўрсатмоқда.