АҚШ Сенатида Владимир Путин раҳбарлигидаги Россияга қарши янги санкциялар пакети тайёрланди. Лойиҳа муаллифлари сенаторлар Ричард Блюментал ва Линдси Грэҳэмнинг маълум қилишича, ҳужжат 81 сенатор томонидан қўллаб-қувватланган ва бу Доналд Трамп вето қўя олмайдиган даражада кўп овоз ҳисобланади.
Санкциялар Россияни изоляция қилиш, уни «савдодан холи орол»га айлантириш ва у билан ҳамкорлик қилувчи давлатларга 500 фоизлик импорт божи жорий этишни назарда тутади. Хусусан, Россиянинг нефт, газ ва уранни сотиб олаётган давлатлар, жумладан Хитой ҳам, жиддий иқтисодий босим остида қолиши мумкин.
Грэҳэм ва Блюменталнинг таъкидлашича, агар Россия яқин кунларда Украина билан тинчлик музокараларига тайёр эканини кўрсатмаса, санкциялар дарҳол кучга киради. АҚШ Сенати бу билан Путинни тинчликка мажбурлаш ниятида.
Сенаторлар Хитойнинг «хуфиёна флот» орқали арзон россия нефтини сотиб олаётганини Путин ҳарбий машинасини қўллаб-қувватлаш деб баҳолаган. Улар Хитойни ҳам жавобгарликка тортишни талаб қилмоқда.
Лойиҳа апрел ойида тақдим этилган ва бугунги кунда Конгресснинг ҳар иккала палатасида кенг қўлловга эга. Агар Путин ўз «ўйин»ларини давом эттирса, Сенат жиддий қадамлар ташлашга тайёр эканини сенаторлар расман баён қилди.