Финландия Банкининг Институти (BOFIT) маълумотларига кўра, Хитойнинг Россияга киритаётган инвестициялари 2011–2018 йиллар давридаги 1,2 миллиард доллардан 2022–2023 йилларда ўртача 400 миллион долларгача камайди. Бу кескин пасайиш The Bell таҳлилчиларининг диққатини тортди.
Россия Марказий банки маълумотларига кўра, охирги уч йил ичида хорижликлар томонидан мамлакат иқтисодиётига киритилган сармоя 57 фоизга камайган. 2022 йил бошида 497,7 млрд доллар бўлган сармоя ҳажми 2025 йил бошига келиб 216 млрд долларга тушган. Бу 2009 йилдан буён энг паст кўрсаткич ҳисобланади.
2025 йил май ойи бошида Россия Президенти Владимир Путин Си Жинпинг билан учрашувда икки давлат муносабатларини «XXI аср намунаси» деб атаган ва хитойлик бизнесменлар учун қулай шарт-шароит яратилишини ваъда қилган. У Хитой компанияларини Россиядаги ишлаб чиқаришга жалб қилишга чақирган.
Бироқ таҳлилчилар фикрича, бу баёнотлар амалий натижа бермаяпти. Пекин расман Россия нефт-газ секторига инвестиция киритишни тақиқлаган, автомобил заводлари қуришга тавсия этмаган ҳамда «Сибир кучи-2» лойиҳасини молиялаштиришдан воз кечган.
Америка тадбиркорлик институти маълумотига кўра, Хитойнинг Россиядаги сўнгги йирик инвестицияси 2021 йилда амалга ошган. Ўшанда Sinopec компанияси нефт саноатига 360 млн доллар сармоя киритган. Шу вақтдан бери Хитой томонидан Россияга катта сармоя киритилмаган.