Япония қишлоқ хўжалиги, ўрмон ва балиқчилик вазири Така Это ўз тарафдорлари унга доим гуруч совға қилишларини таъкидлаб, у гуруч харид қилишга эҳтиёж сезмаслигини айтди. Ҳазил сифатида айтилган бу баёнот эса, аксинча, катта норозилик келтириб чиқарди ва унинг истеъфоси билан тугади.
Мамлакатда юзага келган ҳаёт фаровонлиги инқирози айниқса гуручга қаттиқ таъсир кўрсатди – унинг нархи сўнгги бир йилда икки бараварга ошди. Импорт гуручи камёб бўлган бир пайтда Этонинг гаплари жамоатчилик ғазабини келтириб чиқарди.
Бундай вазият Бош вазир Шигеру Ишибанинг ҳукуматини янада заифлаштирди. Унинг раҳбарлиги аллақачон жамоатчиликнинг қўллаб-қувватлаши пасайиши билан боғлиқ муаммоларга дуч келаётган эди. Япония тарихида гуруч танқислиги сиёсий беқарорликка олиб келган ҳолатлар кўп бўлган. 1918 йилда гуруч исёни бутун бошли ҳукуматнинг ағдарилишига сабаб бўлган.
Экспертлар гуруч нархи ошишига ҳукуматнинг нотўғри тахмини сабаб бўлганини айтишмоқда. Ибараки университети профессори Кунио Нишикаванинг таъкидлашича, 2023-2024 йилларда талаб 7,05 млн тоннани ташкил қилган бўлса-да, ҳукумат 6,8 млн тонна деб баҳолаган. Ишлаб чиқариш эса аслида 6,61 млн тоннадан ошмаган.
Ғалла етиштириш ҳам мураккаб аҳволда. Ниагата вилоятидаги фермерлардан бири Косукэ Касахаранинг таъкидлашича, гуруч етиштириш харажатлари унинг нархидан деярли фарқ қилмайди. Ёш фермерлар эса бу йўналишда барқарор даромад кўрмасликлари сабабли бошқа маҳсулотлар етиштиришга ўтиб кетишмоқда.
Ҳозирда гуруч нархи 60 килограмм учун 40-50 минг иенгача кўтарилган. Ҳукумат март ойида захиралардан гуруч сотувга чиқарган бўлса-да, нархлар тушмаган. Ишибанинг маъмурияти ҳозирда АҚШдан гуруч импорт қилиш бўйича музокаралар олиб бормоқда. Шу билан бирга, мамлакат 25 йилда илк бор Жанубий Кореядан ҳам гуруч импорт қилишга мажбур бўлди. Аммо аҳоли орасида чет эл гуручига нисбатан ишонч паст.