Европа Иттифоқи томонидан эълон қилинган навбатдаги санкциялар рўйхатида 8 та давлатдан 75 та жисмоний ва юридик шахс қайд этилди. Улар орасида Россия, Беларус, Хитой, Туркия, БАА, Сербия ва Виетнам билан бир қаторда Ўзбекистон ҳам бор.
Бу галги рўйхатга 2022 йилда рўйхатдан ўтган, электрон ва телекоммуникация ускуналари ҳамда эҳтиёт қисмларини улгуржи сотиш билан шуғулланувчи Trade Engine System компанияси ҳам киритилди. Шу билан Европанинг расмий санкциялар рўйхатига киритилган ўзбек компаниялари сони бештага етди.
2023 йилдан буён ЕИ санкцияларида Alfa Beta Creative LLC, GFK Logistics Asia LLC ва Mvizion LLC каби компаниялар қайд этилган эди. 2025 йил февралидан бу рўйхатга Uzstanex LLC ҳам қўшилган.
Шунингдек, Украина ҳукумати ҳам айрим ўзбек компанияларини ўзининг санкциялар рўйхатига киритган. Улар қаторида «Оҳангаронцемент», қурилиш техникаси ижараси билан шуғулланувчи Mercury Renaissance, ёғоч маҳсулотлари ва селлюлоза ишлаб чиқарувчи Raw Materials Cellulose ҳамда Фарғона кимё заводи бор.