Европа давлатлари, хусусан Германия, транспорт инфратузилмасини замонавийлаштириш йўлида янги технологик ечимларга мурожаат қилмоқда. Улар орасида эътиборни тортаётган лойиҳалардан бири — ўз-ўзини таъмирловчи асфалт ишлаб чиқарилиши ва қўлланилишидир.
Бу технология Европа Иттифоқининг Cordis Europa дастури доирасида илмий изланишлар асосида ишлаб чиқилган. Асфалт таркибига қўшилган махсус моддалар йўл юзасида юзага келадиган майда ёриқларни табиий тарзда тиклаш қобилиятига эга.
Ўз-ўзини таъмирловчи асфальтнинг афзаллиги шундаки, у оддий асфалтга қараганда анча узоқ муддат хизмат қилади. Бу таъмирлаш ишлари сонини камайтиради ва шу орқали йўллар сифати узоқроқ сақланиб қолади. Шу билан бирга, эксплуатация харажатлари ҳам сезиларли даражада камаяди.
Мутахассислар ушбу технологиянинг экологик устунликларини ҳам қайд этмоқда. Камроқ таъмирлаш ёқилғи сарфини ва чиқиндилар миқдорини қисқартиради, бу эса атмосферага чиқадиган зарарли газларнинг камайишига хизмат қилади.
Германияда мазкур технология амалда синовдан ўтказилмоқда. Яқин келажакда уни Европа Иттифоқининг бошқа аъзо давлатлари ҳам ўз йўл инфратузилмасида жорий этиши кутилмоқда. Бу ташаббус Европа инфратузилмасини барқарор ривожлантиришда муҳим босқич бўлиб хизмат қилади.