Financial Times нашрининг хабар беришича, 2025 йилнинг январ-март ойлари оралиғида 1930 нафардан ортиқ АҚШ фуқароси Британия фуқаролигини олиш учун ариза топширган. Бу кузатувлар олиб борилган барча даврлар орасида энг юқори кўрсаткич сифатида қайд этилди.
Ушбу рақам ўтган чорак билан солиштирилганда 12 фоизга ошган. Мутахассислар бу тенденцияни асосан Доналд Трампнинг АҚШ президентлигига қайта сайлангани билан боғламоқда. Иммиграция ҳуқуқшуносларининг таъкидлашича, кўплаб фуқаролар хавотир, руҳий чарчоқ ва молиявий барқарорлик истаги туфайли бошқа давлатларга, хусусан Буюк Британияга кўчиб ўтишга ҳаракат қилмоқда.
«Одамлар қўрқув, руҳий чарчоқ ва молиявий хавфсизлик истагини ҳис қилмоқда», деди сўровномада қатнашган мутахассислардан бири.
Трампнинг қайта президентликка келиши ортидан АҚШда эмиграция кайфияти кескин ошгани таъкидланмоқда. Ҳатто The Washington Post нашри Трамп ғалабасидан сўнг мамлакатни тарк этишни хоҳлаётган америкаликлар учун махсус қўлланма нашр этган — унда Канада ва бошқа давлатларга кўчиб ўтиш имкониятлари кўриб чиқилган.
Шу билан бирга, сайловлардан сўнг АҚШдаги йирик компаниялар раҳбарлари ҳам ўз лавозимларини тарк этгани, бой фуқароларнинг катта қисми эса мамлакатни тарк этишни режалаштираётгани ҳақида маълумотлар бор. Бунга сиёсий беқарорлик ва ижтимоий нотинчлик хавфи сабаб сифатида келтирилмоқда.