Янги чоралар доирасида АҚШдан Суданга экспорт чекланади ва мамлакатнинг молиявий заём олиш имкониятлари қисқартирилади. Давлат департаменти расмийси Тэмми Брюснинг баёнотида таъкидланишича, бу чоралар кимёвий қуроллар тарқалишига қарши курашда жавобгарликни таъминлаш мақсадида қўлланмоқда.
АҚШнинг даъволарига кўра, Судан ҳукумати хлор газидан икки марта фойдаланган. Бу модда нафас йўлларини қаттиқ шикастлаши мумкин ва ҳалокатли оқибатларга олиб келади.
«Судан ҳукумати кимёвий қуроллардан фойдаланишни дарҳол тўхтатиши ва Кимёвий қуролларни тақиқлаш конвенцияси (CWC) доирасидаги мажбуриятларини бажариши шарт», дейилади баёнотда.
Маълумот учун, деярли барча мамлакатлар каби Судан ҳам ушбу конвенцияни имзолаган. Фақатгина Миср, Шимолий Корея ва Жанубий Судан унга қўшилмаган. Исроил эса шартномани имзолаган, аммо ҳали ратификация қилмаган.
2023 йилда АҚШ Судан ва Rapid Support Forces (RSF) етакчиларига қарши аввалги санкцияларни жорий этган эди. Судан армияси раҳбари Абдел Фаттоҳ ал-Бурҳан демократик ўтиш жараёнини издан чиқаришда айбланган бўлса, RSF бошлиғи Муҳаммад Ҳамдан Дагло (Ҳемедти) геноцид содир этганликда айбланган.
Қаршиликлар икки йилдан буён давом этмоқда. Ҳозиргача 150 мингдан зиёд инсон ҳалок бўлган, 12 миллион киши кўчирилган ва 25 миллион одам озиқ-овқат ёрдамига муҳтож ҳолга келган.
Сўнгги ҳафталарда Суданнинг Бирлашган Араб Амирликлари (БАА) билан муносабатлари ҳам совуқлашди. Судан ҳукумати БААни RSF’га қурол етказиб беришда айблаган. БАА эса буни рад этган. АҚШ Конгрессидаги Демократлар эса шу айбловлар ортидан АҚШдан БААга қурол сотишга тўсиқ қўйиш ҳаракатини бошлаган.
Судан расмийси Reuters агентлигига АҚШнинг ушбу санкцияларни жорий этиши Конгрессдаги БААга қарши кампаниядан эътиборни буриш мақсадида қилинганини айтган.
Айни пайтда, Бирлашган Миллатлар Ташкилотининг Олий суди Суданнинг БААни геноцидда айблаш бўйича даъвосини инкор этди.