2025 йил 23 май куни Bloomberg нашри тарқатган маълумотга кўра, Россия расмийлари Украина билан тинчлик музокараларини Ватиканда ўтказиш ғоясини маъқулламайди. Бу позиция Россия томонининг музокараларга нисбатан эҳтиёткор ёндашувини кўрсатади. Маълум қилинишича, Россия президенти Владимир Путин ҳозирда Ватикан ёки бошқа давлатларга бевосита ташриф буюришни режалаштирмаяпти.
Россия музокараларни ҳозирча техник даражада олиб бормоқда ва 16 май куни Истанбулда бошланган музокаралар айни шу йўналишда давом эттирилмоқда. Сиёсатшунос Сергей Марковнинг таъкидлашича, Ватикан Россия учун бетараф майдон ҳисобланмайди, чунки Ватикан НАТО аъзоси бўлган Италия ҳудудида жойлашган. Шунингдек, Италия Халқаро жиноий суд (ҲЖС)нинг Рим статутисини ратификация қилган ва Путинга қаратилган ордер асосида уни қўлга олиш мажбурияти бор.
Bloomberg’нинг яна бир манбага таяниб ёзишича, Россия православ черкови ҳам Ватикандаги музокараларга қарши. Сабаби — Рим-католик черкови Украинадаги РПЦ ибодатхоналарининг ёпилишига муносабат билдирмаган, ва икки черков ўртасидаги тарихий рақобат сақланиб қолмоқда.
Бундан аввал The Wall Street Journal хабарига кўра, АҚШ президенти Дональд Трамп 19 май куни Европанинг етакчиларига Россия–Украина делегациялари ўртасидаги навбатдаги музокаралар Ватиканда ўтказилишини айтган. Воқеа 2025 йил июн ойи ўртасида бўлиб ўтиши кутилмоқда.
Италия бош вазири Жоржа Мелони ҳам 20 май куни Ватикан музокараларга тайёр эканини билдирган эди. Аммо Россия президентининг матбуот котиби Дмитрий Песков 21 май куни ушбу масала бўйича якуний қарор қабул қилинмаганини, бу масала барча манфаатдор томонлар билан келишилган ҳолда ҳал этилиши кераклигини таъкидлади.