Россия Давлат Думаси депутати Сергей Миронов мамлакатдаги мигрант аёлларга нисбатан янги талабни илгари сурди. Унга кўра, чет эллик аёллар Россияда бепул туғуруқ хизматидан фойдаланиш ҳуқуқидан маҳрум қилиниши керак. Миронов бу хизматдан фақат суғурта полисига эга бўлган аёллар фойдаланиши мумкинлигини таъкидлади.
Унинг фикрича, чет элликлар ўз мамлакатларидаёқ Россия суғурта компанияларининг филиаллари орқали тиббий суғуртага эга бўлиши керак. Бундай ёндашув халқаро амалиётда ҳам қўлланади. Миронов Россия фуқаролари ҳисобидан бундай «саховат» кўрсатишни ноўрин деб ҳисобламоқда.
Шу билан бирга, у агар чет эллик фуқаро Россияда расман ишлаб, камида уч йил давомида иш берувчи томонидан суғурта бадаллари тўланган бўлса, у ҳолда мажбурий тиббий суғурта ҳуқуқига эга бўлишини эслатди.
Инсон ҳуқуқлари бўйича кенгаш аъзоси Кирилл Кабанов эса бу ташаббусни танқид қилиб, уни самарасиз миграция сиёсатини яширишга уриниш деб баҳолади.
Мазкур таклифга адвокат Александр Почуев ҳам қаршилик билдирди. Унинг таъкидлашича, бу ташаббус конституцияда кафолатланган бепул тиббий ёрдам ҳуқуқини бузади. Шунингдек, у Россияда туғиладиган, лекин чет эллик аёллардан дунёга келадиган болаларнинг ҳам ҳуқуқлари поймол этилишини қайд этди.
Почуев, маълум шартлар асосида Россияда туғилган чет эллик болалар «туғилган жой ҳуқуқи» асосида фуқаролик олиш ҳуқуқига эгалигини эслатди.