Федерал авиация маъмурияти (FAA) Нюарк Либерти халқаро аэропортида ҳар соатдаги учиш ва қўнишлар сонини вақтинча 56 тага чеклади. Бу қарор аэропортдаги узоқ давом этган кечикишлар ва бекор қилинган рейслар оқибатида қабул қилинди. Аэропортда одатда ҳар соатда 77 та рейс амалга оширилар эди.
Бу чекловлар 15 июнгача амал қилади, бу вақтда асосий йўлакдаги таъмирлаш ишлари якунланиши кутилмоқда. Шундан сўнг 25 октябргача ҳар соатдаги рейслар сони 68 тага оширилиши режалаштирилган. Аммо, шанба кунлари таъмирлаш ишлари давом этгани сабабли бу кунларда чекловлар сақланиб қолади.
Аэропортдаги муаммоларнинг асосий сабабларидан бири — диспетчерлар етишмаслиги. Ҳозир фақат 24 та сертификатланган диспетчер фаолият юритмоқда, бу эса керакли 38 та диспетчердан анча кам. Шунингдек, 28 апрелдан бошлаб бир неча марта радар ва алоқа тизимларида узилишлар кузатилди, бу эса ҳаво ҳаракати хавфсизлигига жиддий таҳдид солди.
Бу муаммолар натижасида йўловчиларнинг Ньюарк аэропортига бўлган ишончи пасайди. Кўплаб йўловчилар ЛаГуардия ёки JFK каби муқобил аэропортларга мурожаат қилмоқда. United Airlines каби авиакомпаниялар кунлик 35 та рейсни бекор қилишга мажбур бўлди.
FAA муаммоларни бартараф этиш учун техник тизимларни янгилаш ва янги диспетчерларни жалб қилиш ишларини жадаллаштирмоқда. Аммо, мутахассислар бу жараён бир неча йил давом этиши мумкинлигини таъкидлашмоқда.