The Financial Times манбасига кўра, Трампнинг АҚШга импорт қилинадиган Европа товарларига 50 фоизлик бож жорий этиш режаси Европа Иттифоқи иқтисодиётига миллиардлаб евро зарар етказиши мумкин. Асосий таҳдид фармацевтика, автомобилсозлик ва авиация саноатига тегишли.
2024 йилда Европа Иттифоқи АҚШга 530 млрд евро қийматида маҳсулот экспорт қилган бўлиб, бу унинг ташқи савдосининг 20 фоизидан ортиғини ташкил этган. Фармацевтика соҳаси бу экспортда асосий ўрин тутиб, 80 млрд евро ҳажмда маҳсулот етказиб берилган. Агар божлар оширилса, Евроиттифоқда дорилар танқислиги ва тармоқдаги «катта фалокат» юз бериши мумкин.
Автомобил саноати ҳам жиддий хавф остида. АҚШда ишлаб чиқариш қувватига эга бўлмаган Европа брендлари учун 39 млрд евролик экспорт иқтисодий жиҳатдан мақсадга номувофиқ бўлиб қолиши мумкин. Бу эса Германия ва Франция каби автосаноат етакчиларига жиддий таъсир кўрсатади.
Авиация соҳасида эса Airbus ва Boeing ўртасидаги глобал етказиб бериш занжирлари бузилиши мумкин. Тарифлар самолёт қисмлари ва техник хизмат харажатларини ошириб юборади. Бу эса бутун авиатранспорт бозоридаги барқарорликни шубҳа остига қўяди.
Таҳлилчиларнинг баҳолашича, 50 фоизлик божлар Европа Иттифоқи ялпи ички маҳсулотининг 0,5 фоизига тенг иқтисодий йўқотиш келтириши мумкин. Бу вазиятда Евроиттифоқнинг АҚШ билан савдо муносабатлари янада кескинлашиши мумкин.