Xiaomi компанияси ўзининг тарихдаги биринчи флагман чипи — Xring O1’ни Пекиндаги тақдимот маросимида оммага намойиш этди. Ушбу 3 нанометрли процессор Xiaomi Tablet 7 Ultra ва яна икки янги қурилмада ўрнатилиши режалаштирилган. Чип ҳозирча Apple ишлаб чиқарган аналоглардан пастроқ самарадорликка эга бўлса-да, бу Xiaomi учун ўз архитектурасини ривожлантириш йўлидаги муҳим қадам сифатида баҳоланмоқда.
Компания келаси беш йил ичида чип технологияларига $7 миллиард, умумий илмий-тадқиқот ва ишланмалар (R&D) фаолиятига эса $27,8 миллиард сарфлашини маълум қилди. Бу орқали Xiaomi ўзини Apple ва бошқа етакчи технологик гигантлар қаторидан кўришни мақсад қилмоқда.
Презентацияда шунингдек, электр кроссовери YU7 ҳам намойиш этилди. Мазкур модель 2025 йил июлидан аввал сотувга чиқмайди. Эслатиб ўтамиз, март ойидаги SU7 моделининг ҳалокатли ЙТҲидан сўнг, компания электромобилларига бўлган талаб сезиларли даражада камайган эди. YU7 айнан мана шу ишончни тиклашни кўзлайди.
Янги сунъий интеллект маҳсулоти — MiMo нейротармоғи ҳам тақдим этилди. Бу Xiaomi томонидан ишлаб чиқилган биринчи йирик AI ечим бўлиб, смартфонлар ва бошқа қурилмаларда интеллектуал функцияларни кенгайтиришга хизмат қилади.
Лэй Цзюн тақдимотда шундай деди: «Агар бизнинг смартфонларимиз iPhone билан солиштирилаётган бўлса, нега чипларимиз ҳам Apple даражасида бўлмаслиги керак?»