Ню-Делида бўлиб ўтган Шанхай ҳамкорлик ташкилотига аъзо давлатларнинг таҳлил марказлари форумининг 20-йиғилишида Ўзбекистоннинг Стратегик ва минтақалараро тадқиқотлар институти директори ўринбосари Бахтиёр Мустафоев Афғонистон билан ҳамкорликни янада кучайтириш таклифи билан чиқди.
Мустафоевнинг таъкидлашича, ШҲТнинг Афғонистон бўйича Контакт гуруҳи минтақавий ҳамкорлик ва инқирозларга жавоб топишда муҳим механизм бўлиб, унинг қайта фаоллаштирилиши мамлакатдаги гуманитар кризисни юмшатиш ва сиёсий барқарорликни таъминлашда муҳим роль ўйнаши мумкин.
Унга кўра, Афғонистон билан алоқаларни фаоллаштириш минтақада хавфсизлик ва барқарорликни таъминлашнинг калит омилларидан бири ҳисобланади. Шу боис, ШҲТга аъзо давлатлар ушбу масалада ўз саъй-ҳаракатларини мувофиқлаштириши зарур.
Мустафоев, шунингдек, Афғонистонни ижтимоий-иқтисодий жиҳатдан қўллаб-қувватлаш зарурлигини таъкидлади. Унинг фикрича, Термиз шаҳридаги замонавий инфратузилмадан фойдаланиб, таълим, тиббиёт ва гуманитар лойиҳаларни амалга ошириш мумкин.
Форум доирасидаги бу каби таклифлар ШҲТнинг минтақавий аҳамиятга эга муаммоларга муносабатида янгиланган ёндашувларни кўрсатмоқда. Афғонистонда барқарорликни тиклаш бўйича кўп томонлама ҳамкорлик ШҲТ учун муҳим стратегик вазифа бўлиб қолмоқда.