АҚШ Президенти Доналд Трамп Россиянинг Украинага қарши энг йирик ҳаво ҳужуми ортидан Владимир Путинни кескин танқид қилди. Якшанба куни кечқурун Нью-Жерсиде журналистлар билан суҳбатда у: «у шаҳарларга ракеталар юборяпти ва одамларни ўлдиряпти. Бу менга мутлақо ёқмайди», деди. Кейинчалик у Truth Social’да Путинни «умуман жинни бўлиб қолган», деб атади.
Бу баёнотлар Россия томонидан 367та дрон ва ракета юборилиб, Украинада камида 12 нафар инсон ҳалок бўлган, юзлаб киши яраланган кечанинг ортидан айтилди. Украина президенти Владимир Зеленский эса АҚШ томонидан жимлик сақланаётганини танқид қилиб, бу Путинни рағбатлантираётганини таъкидлади ва Москвага нисбатан қаттиқ санкциялар жорий этилишини талаб қилди.
Трамп Россияга қарши янги санкциялар қўллаш мумкинлигини истисно қилмади. Гарчи у бу каби таҳдидларни аввал ҳам билдирган бўлса-да, ҳозиргача жиддий чекловлар жорий этилмаган. Шу билан бирга, у Зеленскийни ҳам танқид қилиб, «у айтган ҳар бир сўз муаммо келтиряпти», деди.
Ўтган ҳафта Трамп ва Путин ўртасида икки соатлик телефон мулоқоти бўлиб ўтди. Унда АҚШнинг тинчлик келишуви таклифи муҳокама қилинди. Трамп бу суҳбатни самарали деб баҳолаб, тарафлар зудлик билан урушни тўхтатиш бўйича музокараларга киришишини айтди. Украина 30 кунлик сулҳга розилик билдирди.
Россия эса ҳозирча «мумкин бўлган тинчлик шартлари» бўйича меморандум устида ишлашини маълум қилди. Бу Киев ва Европадаги иттифоқчилар томонидан вақтни чўзиш сифатида баҳоланди.
2022 йилдан бери илк тўғридан-тўғри Украина-Россия музокаралари 16 май куни Истанбулда ўтказилди. Бир ҳафта аввал амалга оширилган ҳарбий асирлар алмашинуви бўйича келишувдан ташқари, урушни тўхтатишда сезиларли натижага эришилмади. Айни пайтда Россия Украина ҳудудининг тахминан 20 фоизини, жумладан 2014 йилда аннексия қилинган Қримни назорат қилмоқда.