Чеченистон Республикаси раҳбари Рамзан Қодиров ўзининг Телеграм канали орқали видеомурожаат эълон қилиб, унга нисбатан тарқалаётган касаллик ҳақидаги миш-мишларга муносабат билдирди. У видеода тарихий минора ёнидан ўтаётган пайтда, орқа фондда унинг номидан ўлим ва ҳаёт ҳақида фикрлар ўқиб эшиттирилди.
«Кейинги пайтларда менинг касалллигим тўғрисида, гуёки мен ўлим билан олишётганим, саноқли кунларим қолгани ҳақида миш-мишларни кўп эшитаяпман. Биринчидан, дард ва ўлим — ҳар бир инсоннинг ҳаёт йўли. Тирикларнинг ҳеч бири бу йўлдан қочиб қутилолмаган. Иккинчидан, касаллик ва саломатликка таҳдид умрни қисқартирмайди. Умрнинг узунлигини уни бахшида этган Зот белгилайди. Агар менинг тақдиримда 50, 60 ёки 70 йил умр кўриш ёзилган бўлса, ҳар бир кунини яшайман, ҳеч ким буни бирор кунини бекор қила олмайди», дейилган мурожаатда.
Унинг таъкидлашича, миш-миш тарқатувчилар — журъатсиз одамлар бўлиб, чет элда «сичқондай яширинган» шахслардир. Видеога ёзилган изоҳда эса у ҳар бир кун — Яратгандан берилган ноёб неъмат эканини эслатди. «Сўзлар билан фитна қилманг, ҳаётни яхшилик ва самимият билан тўлдиринг», — дейди у.
Қодировга ҳозир 48 ёшда. «Новая газета. Европа» нашрининг ёзишича, унга олти йил муқаддам шифокорлар панкреонекроз ташхисини қўйган ва шифо топиш имкони йўқлигини билдиришган. Жорий йил баҳорида эса унинг аҳволи жиддий ёмонлашгани ва у Грознийдаги «Аймед» клиникасидан деярли чиқмай қолгани айтилган.
Аввалроқ Қодиров ўз соғлиғи билан боғлиқ миш-мишларни бир неча марта рад этган. 2023 йили у Грознида сайр қилаётган видеосини эълон қилиб, интернетдаги гап-сўзларга ишонмасликка чақирган эди. Шу йил январда у жамоатчилик олдида 18 кун кўриниш бермади. Сўнгра Чеченистон ҳукумати раҳбари Магомед Даудов у билан чой ичиш пайтидаги видеони тақдим этган эди.
Май ойи бошида Қодиров Россия президенти Владимир Путиндан ўзини лавозимдан озод қилишни сўраш нияти борлигини билдирган. Бироқ Кремлда бўлиб ўтган учрашувдан сўнг у президент бу илтимосни рад этганини маълум қилди ва Путиннинг «ўлим ҳақидаги хабарлар жуда ҳам бўрттирилган» деган сўзларини келтирди. Қодиров шундан сўнг «олий бош қўмондон буйруғини бажариш»га киришганини маълум қилган.