АҚШ президенти Доналд Трамп маъмурияти чет эллик талабалар учун виза интервюларини вақтинча тўхтатди. Politico нашри хабар қилишича, бу қарор давлат котиби Марко Рубио имзолаган Давлат департаменти хати асосида барча элчихоналар ва консулликларга юборилган. Унга кўра, янги кўрсатмалар берилмагунича F, M ва J турдаги визалар учун янги суҳбат муддатлари тайинланмайди.
Мазкур чеклов виза аризаларини кўриб чиқиш жараёнини сезиларли даражада секинлаштириши мумкин. Бу, айниқса, хорижий талабаларга молиявий жиҳатдан таянувчи Америка университетлари учун салбий таъсир кўрсатади. Чет эллик талабалар кўпгина олий таълим муассасалари учун даромаднинг муҳим манбаси саналади.
Таҳлилларга кўра, ушбу қарор ижтимоий тармоқлар орқали талабаларнинг фаолиятини чуқурроқ ўрганишга тайёргарликнинг бир қисми ҳисобланади. Илгари бундай текширувлар чекланган миқёсда ўтказилган бўлса, эндиликда барча аризачилар қамраб олиниши мумкин. Трамп маъмурияти, хусусан, Исроилга қарши намойишларда қатнашган талабаларга эътибор қаратиб келаётган эди.
Янги чекловлар АҚШ университетларига нисбатан сиёсий босимлар фонида амалга оширилмоқда. Трамп қайтиб келганидан сўнг, университетларда антисемитизмга қарши кураш ҳақидаги фармонни имзолади ва Harvard каби олий ўқув юртларига хорижлик талабалар тўғрисида маълумот тақдим этишни талаб қилди. Университетлар бунга қарши чиққач, давлат молиявий жазо чораларини қўллади, жумладан, миллиардлаб доллар маблағларни музлатди.
Сўнгги чора-тадбирлар 7 мингдан ортиқ халқаро талабанинг тақдирига таҳдид солмоқда. Harvard бу қарорни судга бериб, вақтинча тўхтатишга эришди. У ўз мустақиллигини ҳимоя қилмоқда ва маъмуриятни илм ва таълим тизимини заифлатишда айбламоқда.
Шу билан бирга, март ойида Трамп АҚШ Таълим вазирлигини тугатиш ҳақидаги фармонни ҳам имзолади. Унга кўра, бу идора «аҳамиятсиз» деб топилган ва президент уни имкон қадар тез ёпиш ниятида эканлигини айтган.