Truth Social тармоғидаги чиқишида у Россия раҳбарини «ўт билан ўйнашаяпти» деб атади ва Москва учун жиддий оқибатлар бўлиши мумкинлигини билдирди.
Трамп ўз баёнотида: «Путин тушуна олмаётган нарса шундаки, агар мен бўлмаганимда, Россия аллақачон жуда жиддий муаммоларга дуч келган бўларди. Мен ҳақиқий фалокатларни назарда тутяпман. У ўт билан ўйнашаяпти!», — деб ёзди. У бундан олдин ҳам Путинни тинч аҳолига қарши зўравонлик қилаётганликда айблаб, унинг ҳаракатларини «ақлдан озиш» деб баҳолаганди.
АҚШ президентининг фикрича, Путин фақат Украина ҳудудининг бир қисмига эмас, балки бутун мамлакатга эга чиқишни истайди. «Агар у шу йўлдан борса, бу Россиянинг ҳалокатига олиб келади», — деган эди Трамп аввалги баёнотида.
The Wall Street Journal манбаларига кўра, Трамп Украинадаги музокаралар жараёни тўхтагани ва Россиянинг янги ҳужумлари сабабли Россияга қарши янги санкциялар пакетини жорий ҳафтанинг ўзида эълон қилиш имконини кўриб чиқмоқда.
Шу билан бирга, сенатор-республикачилардан Линдси Грэҳэм ҳам Москвага босимни кучайтириш учун янги ташаббус билан чиқди. У Россия энергия ресурсларини сотиб олишда давом этаётган давлатларга 500 фоизлик божлар жорий этишни таклиф қилди. Грэҳэмнинг таъкидлашича, агар Хитой ва Ҳиндистон арзон нефт харидини тўхтатса, «Путиннинг уруш машинкаси» тўхтаб қолади. Мазкур қонун лойиҳаси аллақачон 100 сенатордан 82 нафари томонидан қўллаб-қувватланган.
25 май куни Россия армияси Украина инфратузилмасига 300 та дрон ва 70 га яқин турли турдаги ракеталар билан кенг кўламли ҳужум уюштирди. Украина расмийларининг маълум қилишича, ҳужумлар натижасида 13 нафар тинч фуқаро ҳалок бўлди. Эртасига, 26 май куни эса Россия ҳужум миқёси бўйича янги рекордни ўрнатди — Украина ҳудудига 355 дрон ва 9 ракета йўлланган.
Украина президенти Володимир Зеленский мазкур вазият ортидан АҚШ ва Ғарб иттифоқчиларини Москвага нисбатан янада қаттиқ санкциялар жорий этишга чақирди. Унинг сўзларига кўра, Россия урушни атайлаб чўзмоқда ва ҳар куни тинч аҳоли ўлдирилишда давом этмоқда.