Мерц бу ҳақда Финляндия бош вазири Петтери Орпо билан Турку шаҳрида ўтказилган қўшма матбуот анжуманида гапирди. «Мен бу уруш тез якун топади, деб ўйламаганман. Кремль ҳозир музокара ўтказишга ҳеч қандай қизиқиш билдирмаяпти», — деди канцлернинг сўзларини келтирмоқда dpa агентлиги.
Урушнинг тез орада тугаши эҳтимоли паст эканини айтган Мерц, одатда бундай можаролар иқтисодий ёки ҳарбий заифлик туфайли тўхтайди, аммо бу ҳолатда бунга ҳали анча борлигини таъкидлади. Унинг сўзларига кўра, Европа узоқ муддатли қарши туришга тайёр туриши керак.
Канцлер, шунингдек, Украина ўзини ҳимоя қилишни давом эттириши шартлигини ва Германия унга ёрдам беришни тўхтатмаслигини айтди. Унинг фикрича, Россия урушда ўз ҳисобига хато йўл қўйган ва сўнгги йилларда Европа бирдамлиги мустаҳкамланган. НАТО эса Швеция ва Финландия қўшилганидан кейин янада кучайган.
«1990 йилдан кейин Россия билан бирга барпо этилган сиёсий тартиб-қоидалар шубҳа остида қолди. Биз таҳдид остидамиз ва ўзимизни ҳимоя қиляпмиз», — деди Мерц. Унинг фикрича, Россия фақат ҳудудлар учун эмас, балки кенгроқ мақсадлар билан уруш олиб бормоқда.
Шу билан бирга, Мерц Киевга Ғарбдан етказилаётган қуролдан фойдаланиш бўйича чекловларни бекор қилиш ҳақидаги баёнотига ҳам изоҳ берди. Унинг таъкидлашича, бу янгилик эмас — қарор бир неча ой аввал қабул қилинган.