«Президент Трампнинг фикри тўғри — бу қатлларни тўхтатиш керак. Статистикага қарасангиз, бу оммавий қирғун. Ҳар икки томондан жами йўқотишлар сони 1,2 миллионга етган», — деди у Fox News эфирида.
Келлогга кўра, Россия ва Украинадаги ҳалок бўлган ва яраланганлар сони Иккинчи жаҳон урушида АҚШ армияси кўрган йўқотишлардан ҳам ошиб кетган. 1941–1945 йилларда АҚШ 418 минг аскардан ажралган, яна 670 минг киши яраланган эди.
Уруш давомида тинч аҳоли яшайдиган шаҳарларга қараб назоратсиз ракета ва дрон ҳужумлари амалга оширилаётгани, Келлогнинг фикрича, мутлақо йўл қўйиб бўлмайдиган ҳолатдир.
BBC ва «Медиазона» манбалари Россия қуролли кучларининг тасдиқланган йўқотишлари 108 минг аскардан ошганини маълум қилмоқда. Уларнинг 5037 нафари — офицерлар, шу жумладан 10 нафар генерал. Британия мудофаа вазирлиги ва НАТО маълумотларига кўра, Россияда ҳалок бўлган ҳарбийлар сони 250 мингга яқин, яраланганлар билан бирга жами йўқотишлар 900 мингдан ошган. Стратегик тадқиқотлар бўйича халқаро институти (IISS) ҳисобларича, 376 мингга яқин россиялик фронтда оғир жароҳат олиб, ногиронга айланган.
Кит Келлог, шунингдек, Украина Вашингтонга келажакдаги тинчлик келишуви учун ўз шартларини тақдим этганини, АҚШ ҳозир Кремлдан шунга ўхшаш ҳужжатни кутаётганини маълум қилди. Унга кўра, иккала томоннинг таклифлари қиёслаб чиқилади ва ўзаро мувофиқ нуқта топишга ҳаракат қилинади.
Келгуси музокаралар Россия ва Украина делегациялари ўртасида Швейцариянинг Женева шаҳрида ўтказилиши мумкин. Келлог аввалроқ музокараларни Ватиканда ташкил қилиш ниятида бўлишганини, аммо Россия буни рад этганини билдирди.