Шу билан бирга, умумий ҳисобда 1,56 миллионга яқин жанговар ҳаракатлар иштирокчилари учун гувоҳномалар ҳам буюртма қилинган.
2023 йилда гувоҳнома тайёрлаш энг авж нуқтасига чиққан: у пайтда 800 мингдан зиёд ветеранлар учун ва 250 мингдан зиёд ҳалок бўлганлар оилалари учун ҳужжатлар буюртма қилинган. 2024 йилда эса бу кўрсаткич анча пасайди — тегишлича 304 минг ва 8 минг гувоҳнома. Аммо 2025 йилда қайтадан ўсиш кузатилди: 357 минг гувоҳнома буюртма қилинди, шундан 40,2 минг нафари ҳалок бўлганлар оилалари учун тайёрланган.
Ушбу гувоҳномалар 11 та федерал идоралар орасида тақсимланган бўлиб, энг кўпи — 744 897 дона — Мудофаа вазирлигига берилган. Кейинги ўринда Меҳнат вазирлиги ва унинг таркибидаги муассасалар — 531 997 гувоҳнома, шунингдек, ИИВга 147 минг гувоҳнома топширилган.
«Вёрстка» нашрининг таъкидлашича, бундай гувоҳномалар урушдан аввал ҳам тайёрланган, аммо ҳажми анча кам бўлган. Уруш бошлангандан бери, айниқса ҳалок бўлганлар оилалари учун тайёрланаётган ҳужжатлар сони кескин ортган. Бироқ, уларнинг қанчаси айнан Украинадаги урушда қатнашганларга тегишли экани аниқ кўрсатилмаган.
Шу билан бирга, 2025 йил феврал ойи ҳолатига кўра, Халқаро стратегик тадқиқотлар институти Россия армияси йўқотишларини 783 минг киши деб баҳолаган — 172 минг ҳалок бўлган ва 376 минг киши ногирон бўлиб қолган. Буюк Британия Мудофаа вазирлиги эса бу кўрсаткични 950 мингга етганини билдирган.
Reuters ва ISW таҳлилларига кўра, Россия ҳозир Украина ҳудудининг 20 фоиздан камроғини назорат қилмоқда. Forbes ҳисоб-китобига кўра эса, шу суръатда уруш давом этса, Украина ҳудудини тўлиқ эгаллаш учун Россияга 230 йил ва 101 миллион қурбон талаб қилинади.