Германиянинг «Bild» газетаси бош муҳаррири ўринбосари Паул Ронцҳаймер 28 май куни ижтимоий тармоқдаги саҳифасида TAURUS ракета тизимларини Украинага етказиб бериш бўйича ҳозирча ҳеч қандай қарор қабул қилинмаганини маълум қилди. Унга кўра, бу масала ҳозирча мамлакатда «тақиқланган мавзу» сифатида қолмоқда.
Ронцҳаймер Германия канцлери Фридрих Мерцнинг яқинда билдирган баёнотини ҳам танқид қилиб, ундаги «Украина буни ҳозироқ қила олади», деган гап нотўғри тасаввур уйғотганини айтди. Унга кўра, Украина ҳозирча Германиядан олинган чекланган масофали қуроллардан фойдаланмаяпти ва TAURUS ракеталари умуман берилмаган.
Журналистнинг таъкидлашича, Украина президенти Володимир Зеленскийнинг 28 май куни Берлинга амалга ошираётган расмий ташрифи давомида ҳам ушбу ракета тизимлари масаласи муҳокама қилинмаслиги режалаштирилган.
TAURUS — бу «ҳаво–ер» туридаги, узоқ масофага учадиган, юқори аниқликка эга бўлган ракета ҳисобланади. У жуда паст баландликда (50 метр) учиш қобилиятига эга бўлиб, душман радиолокаторларидан яшириниш учун мўлжалланган. Ракета кучли ҳимояланган ҳудудларга зарба бериш учун ишлатилади.
Германияда ушбу ракеталарни Украинага бериш масаласи кўп йиллардан бери муҳокамада бўлиб келмоқда. Аввалги канцлер Олаф Шолц бу ташаббусни тўхтатиб келган бўлса, ҳозирги ҳукумат ҳам расмий қарор қабул қилмаган ҳолда жиддий қарама-қаршиликларга дуч келмоқда.