Британиянинг The Times нашрига кўра, Доналд Трамп сўнгги ҳафтадаги Россия ҳаво ҳужумларидан сўнг ўзининг Truth Social саҳифасида Путиннинг хатти-ҳаракатларини танқид қилар экан, «у одамларни беҳудага ўлдирмоқда» деган эди. Шу муносабат билан The Times, Трампнинг бу хулосага нега энди келгани ҳақида савол қўяди. Чунки яна 2022 йилнинг февралидаёқ АҚШ Сенатидаги разведка бўйича қўмита раисининг ўринбосари Марко Рубио Путиннинг когнитив саломатлиги билан боғлиқ муаммолари ҳақида огоҳлантирган эди.
Рубиога кўра, Путин доимо ўзини ҳис-туйғуларини назорат қилиш қобилияти билан мақтаниб келган. Аммо сўнгги пайтлардаги ўта эҳтиросли ва ғазабли чиқишлари унинг ўзини тута олмаслигини кўрсатмоқда. Twitter’даги постида у: «Афсуски, айрим маълумотлар билан ўртоқлаша олмайман, лекин кўпчилик учун очиқ аён: Путиннинг нимасидир нотўғри», — деб ёзган эди.
Бундан икки йил ўтгач, собиқ Fox News журналисти ва Трампнинг ёрдамчиси бўлган Такер Карлсон ҳам Путин билан суҳбатдан сўнг унинг ақлий ҳолати ҳақида шубҳалар борлигини айтган.
The Times маълумотига кўра, Трамп президентлик даврида Путинга бир неча марта «келишув» таклиф қилган: Қримни Россия ҳудуди сифатида тан олиш, иқтисодий алоқаларни тиклаш ва санкцияларни қисман бекор қилиш. Бироқ яқиндаги телефон суҳбатида Трамп Россиядан ҳеч нарса талаб қилмаган ва Киевга тўғридан тўғри музокара қилишни тавсия қилган. Бу суҳбатдан сўнг Россия армияси уруш бошланганидан буён энг катта ҳаво ҳужумини амалга оширган. Шунинг ортидан Трамп оммавий ахборот воситаларига Путиннинг бундай хатти-ҳаракатларини тушуна олмаётганини айтган.