Жаҳон Метеорология Ташкилоти огоҳлантиришича, 2025 йилдан 2029 йилгача бўлган даврда Ер юзасидаги ўртача ҳарорат 1850–1900 йиллар орасидаги кўрсаткичлардан 1,2–1,9°C юқори бўлиши кутилмоқда. Бу инсон фаолияти туфайли содир бўлаётган глобал исиш жараёни янада тезлашганини англатади.
Олимлар таъкидлашича, ушбу беш йиллик даврда камида бир йил тарихдаги энг иссиқ йил сифатида қайд этилиши мумкин. Бу ҳолат ҳаттоки 2024 йилда кузатилган юқори ҳарорат кўрсаткичларидан ҳам ошиб кетиши мумкинлигини кўрсатмоқда.
Энг хавотирли кўрсаткичлардан бири — ҳароратнинг 1,5°C дан ошиб кетиш эҳтимоли 70 фоизга етганидир. Солиштириш учун, бу кўрсаткич 2024 йилда 47% ва 2023 йилда 32% эди. Бу дегани, глобал исиш тезлиги йилдан-йилга ортиб бормоқда.
Мутахассислар ҳарорат ошиши оқибатида бутун дунё бўйлаб кучли ёмғирлар, қурғоқчилик, иссиқлик тўлқинлари ва денгиз сатҳининг кўтарилишига ўхшаш ҳалокатли табиий ҳодисалар тез-тез юз бериши мумкинлигини таъкидлашмоқда.
Иқлим ўзгаришига қарши кураш ва чиқиндиларни камайтириш бўйича халқаро ҳамкорликни кучайтириш талаб этилаётган бир пайтда, ушбу маълумотлар экологик хавф-хатарлар жиддий тус олганини яна бир бор кўрсатмоқда.