Лондондаги савдолар давомида Brent нефти фючерслари 0,65 фоизга қимматлашиб, бир баррел учун 65,32 доллар даражасига етди. WTI нефти эса 0,61 фоизга ошиб, 62,22 долларни ташкил қилди. Бу ўсиш, АҚШ савдо судининг Доналд Трамп томонидан жорий этилган кенг қамровли импорт божларини бекор қилиши билан боғлиқ.
Суд қарорига кўра, президент мазкур божларни жорий этиш ваколатига эга бўлмаган. Бу дунё иқтисодиёти учун хатарларни камайтиради ва, натижада, нефтьга бўлган талабни оширади, деб ҳисоблайди экспертлар. «Инвесторлар иқтисодий ноаниқликдан қисқа фосила олдилар», — дейди City Index компаниясидан Мэтт Симпсон.
Шу билан бирга, бозорлар OPEC+ ташкилотининг яқиндаги йиғилишига диққат қаратган. Reuters манбаларига кўра, алянс кунлик қазиб чиқариш квотасини 411 минг баррелгача оширишга келишиши мумкин. ING таҳлилчилари бу тенденция учинчи чорак охиригача давом этишини кутмоқда.
Яна бир хавф — Chevron компаниясининг Венесуэладаги фаолиятини тўхтатиши бўлди. Вашингтон томонидан берилган лицензиянинг қайтарилиши компанияни нефт қазиб олиш ва бошқа операцияларни тўхтатишга мажбур қилди.
АҚШдаги нефт ва бензин захиралари камайгани, аммо дистиллятлар захираси кўпайгани ҳақида Америка нефт институти хабар берди. Трейдерлар ҳозирда соат 21:00 да чиқарилиши кутилаётган Энергетика ахборот бошқармаси маълумотларини кутмоқда.