29 май куни соат 14:40 да UzAuto Motors компанияси Chevrolet Malibu XL автомобили учун контрактация қайта бошланганини эълон қилди. Компания маълумотига кўра, мижозларга керакли ранг ва модификацияни танлаш имкони берилган.
Бироқ ортиқча вақт ўтмасдан, аниқроғи, соат 15:22 да барча шартномалар якунлангани тўғрисида расмий хабар берилди. Компания томонидан нечта шартнома тузилгани ҳақида маълумот очиқланмаган.
Шу билан бирга, 14:58 ҳолатида ҳам Uzavtosavdo.uz сайти орқали Malibu XL учун шартнома тузиш имкони мавжуд эмас эди. Бу ҳолат автомобил сотуви жуда тез якунланганини тасдиқлайди.
Маълумот учун, Malibu XL моделининг контрактацияси 2024 йил апрел ойи бошида тўхтатилган эди. «Янгиланган» Malibu сотуви илк бор 2023 йил мартда бошланган бўлиб, расман 3 хил комплектация таклиф қилинган: XL 1LT – 375 млн сўм, XL 2LT – 390 млн сўм ва XL LTZ – 419 млн сўм. Лекин амалда фақат энг қиммат комплектация — LTZ сотувда мавжуд бўлган.
Шу йил апрел ойида ижтимоий тармоқларда янги Malibu-2 автомобиллари акс этган видео тарқалгач, UzAuto Motors бу моделлар Хитойдан олиб келинаётганини тасдиқлаган.