Қонунга кўра, товар етказиб беришдаги ҳар бир кечиккан дақиқа, соат ёки кун учун истеъмолчига шартнома бўйича бажарилмаган мажбурият қийматининг 0,5 фоизи миқдорида жарима тўланади. Бироқ пеня суммаси товар умумий нархидан ошиб кетмаслиги шарт қилиб белгиланган.
Мазкур норма харидор ва сотувчи ўртасидаги муносабатларда аниқлик ва шаффофликни таъминлаш, айниқса, онлайн савдо майдонларида истеъмолчилар ҳуқуқини ҳимоя қилишни кучайтиришга қаратилган.
Сенатнинг навбатдаги ялпи мажлисида маъқулланган ушбу ҳуқуқий ўзгариш сотувчилар масъулиятини ошириши ва турли муаммоларни олдини олиши кутилмоқда.
Эслатиб ўтамиз, аввалроқ Uzum Market платформасида сотувчилар товарларни ўзлари етказиб бериши мумкинлиги ҳақида хабар берилган эди. Янги қонун эса, шундай ҳолатларда ҳам харидор манфаатларини ҳуқуқий асосда ҳимоялашни таъминлайди.