Маълумотларга кўра, АҚШ президентининг Яқин Шарқ бўйича махсус вакили Стевен Уиткофф икки томоннинг келишувга рози эканини тасдиқловчи расмий хабарни олган.
Al Arabiya нашрига кўра, келишув матни Уиткофф томонидан ишлаб чиқилган бўлиб, унинг ижроси ва мониторинги АҚШ, Миср ва Қатар томонидан амалга оширилади. Ушбу уч давлат, шунингдек, 60 кунлик муддат якунлангач, келишувни узайтиришда кафил сифатида иштирок этади.
The Jerusalem Post нашри хабарида, келишув доирасида 10 нафар исроиллик асир озод қилинади, шунингдек, Исроилга 18 нафар ҳалок бўлган шахснинг жасади қайтарилиши режалаштирилган. Қўшимча қилинишича, Исроил армияси яқинда эгалланган Ғазодаги ҳудудлардан чиқиб кетади. Инсонпарварлик ёрдамини тақсимлаш ишлари эса яна БМТ назоратига ўтади.
Эслатиб ўтамиз, бу Исроил ва ҲАМАС ўртасидаги биринчи ўт очишни тўхтатишга оид келишув эмас. Илгарироқ ҳам шундай музокаралар бўлиб ўтган, лекин сўнгги марта март ойидаги шартнома узайтирилмай қолган эди.
Май ойида Исроил «Гидеон араваси» номли янги кенг кўламли ҳарбий операцияни бошлаганини эълон қилган, унда ЦАҲАЛнинг асосий пиёда ва танк бригадалари ҳамда захира қисмлари иштирок этган эди.
28 май куни Уиткофф Оқ уйда матбуот анжумани ўтказиб, АҚШ яқин кунларда Исроил ва ҲАМАСга янги оташкесим шартларини расмий равишда тақдим этишини маълум қилган эди.