Қозоғистон энергетика вазири ўринбосари Алибек Жамауовнинг айтишича, 1 июлдан бошлаб нефт қазиб олиш ҳажмини ошириш бўйича қарор шанба куни қабул қилинади. Аммо ҳозирча аниқ рақамлар маълум эмас — кунда 400 мингдан 600 минг баррелгача бўлиши мумкин. Reuters маълумотига кўра, OPEC+ давлатлари бозордаги улушини сақлаш мақсадида шошилинч равишда қазиб олиш ҳажмини ошириш масаласини муҳокама қилмоқда.
ING таҳлилчилари гуруҳ 411 минг барреллик кунлик ўсишга келишиши мумкинлигини тахмин қилмоқда. Бундай суръат учинчи чорак охиригача сақланиши мумкин.
Шу билан бирга, Венесуэлада Chevron компанияси фаолияти тўхтатилгани ҳам таклиф томондан хавфларни оширди. Бу мамлакатда компания кунда 290 минг баррел нефт экспорт қиларди. Бундан ташқари, Канададаги ёмғирсизлик ва ўрмон ёнғинлари туфайли Алберта провинциясида қисман эвакуация амалга оширилди ва нефт қазиб олиш вақтинча тўхтатилди.
Бу орада, бозор АҚШнинг API ва EIA ташкилотлари томонидан эълон қилиниши кутилган ҳафталик захиралар ҳисоботига ҳам катта эътибор қаратмоқда. Илк маълумотларга кўра, бензин ва хом нефт захиралари камайган, дистиллатлар эса кўпайган.
Rystad Energy таҳлилчиси Мукеш Шаҳдевга кўра, майдан августгача суюқ ёқилғига талаб таклифдан кунлик 600–700 минг баррелга ошиб кетиши мумкин.