ТРХнинг таъкидлашича, бундай етказиб беришларни «ҳуманитар мақсадлар» билан оқлаш мумкин эмас. Қуролларнинг асосий мақсади — россиялик аскарлар ва тинч аҳолига қарши қаратилган, дейилади идора баёнотида. Қўшимча қилинишича, Сербиянинг бу ҳаракатлари «ўлим конвейери» ва «дўстга қарата узилган ўқ» деб баҳоланади.
Белград аввалроқ ўқ-дори ва қурол-яроғлар Ғарб давлатларига экспорт қилинаётганини тан олган эди. Бу мамлакатлар орқали у қурол Украинага етиб бораётгани маълум бўлган. Financial Times хабарига кўра, бу экспортлар умумий қиймати 800 млн еврони ташкил этиши мумкин.
Сербия президенти Александр Вучич бундай экспортни мамлакат иқтисодиётини тиклаш стратегиясининг бир қисми сифатида баҳолаган. Бош вазир Милош Вучевич эса Испания, Чехия ёки АҚШга ўқ-дори сотилишини чеклаш нияти йўқлигини айтган.
Шу билан бирга, Белград 2025 йил январь ойида Россия билан бир неча қурол сотиб олиш шартномаларини санкциялар сабаб бекор қилган эди. Шунга қарамай, Вучич 9 май куни Москвада ўтказилган Ғалаба парадида қатнашган Европадаги кам сонли раҳбарлардан бири бўлди.