CNN телеканалининг хабар беришича, АҚШ Олий суди 2023 йилда Жо Байден маъмурияти томонидан жорий этилган вақтинча бошпана дастурини тўхтатиш бўйича Трамп маъмуриятининг талабини қондирди. Ушбу дастур Венесуэла, Ҳаити, Куба ва Никарагуа фуқароларига АҚШда вақтинча яшаш ва ишлаш ҳуқуқини берган эди.
Қарорга кўра, Трамп маъмурияти энди дастурдан фойдаланган тахминан 530 минг мигрантни депортация қилишни жадаллаштириши мумкин. Бу сўнгги бир ой ичида Олий суд Трампнинг миграция сиёсатига иккинчи марта ёрдам берган ҳолатдир. Илгарироқ, яна бир шунга ўхшаш дастурни бекор қилишга ҳам суд рухсат берган эди.
Олий суд қарори якуний эмас, асосий иш суднинг паст даражали инстанцияларида кўриб чиқилишда давом этади. Аммо бу оралиқ қарор депортация жараёнларини амалга оширишга йўл очиб беради.
Икки судя — Соня Сотомайор ва Кетанжи Браун қарорга қарши чиқди. Улар ушбу қарорни «ярим миллион одамнинг ҳаёти ва яшаш воситаларини кескин бузиш» сифатида баҳолашди. Сотомайор бу ҳаракатни инсонпарварлик нуқтайи назаридан хавфли, деб атади.
Шу пайтда Оқ уй маъмурияти вакили Стивен Миллер суд қарорини олқишлаб, «суд аҳмоқона фармонларига чек қўйилди», деди. Трампнинг айтишича, у президентликнинг илк кунидаёқ дастурни бекор қилган. Республикачилар маъмурияти 1 йил ичида 1 млн мигрантни депортация қилишни режалаштирмоқда.
Таҳлилчилар бу рақамнинг амалга ошиши қийинлигини таъкидлашмоқда. Қайд этилишича, ҳозиргача энг катта депортация 400 мингдан ортиқ кишини чиқарган Обама маъмуриятига тегишли бўлган.
Аввалроқ АҚШ апелляция суди Доналд Трамп маъмурияти томонидан хорижий маҳсулотларга жорий этилган, аммо аввалроқ федерал суд томонидан тўхтатилган божларни вақтинча тиклагани хабар қилинган эди.