30 май куни Илон Маск АҚШдаги расмий давлат хизматидан расман кетди. Унинг «ҳукумат самарадорлигини ошириш департаменти» (DOGE)даги 130 кунлик фаолияти якунланди. Бу муносабат билан Доналд Трамп унга Оқ уйнинг рамзий олтин калитини топширди.
Трамп калитни топшириш маросимида Маскни АҚШ номидан тақдирланаётган «ўта махсус шахс» сифатида таърифлади. У бу калитни аввалроқ фақат Исроил Бош вазири Бинямин Нетаняҳу каби етакчиларга тақдим этган. Калит аниқ функцияга эга эмас, у шунчаки эътироф рамзи сифатида берилади.
«Раҳмат, Илон. Сен фақат давлат учун эмас, балки келажак учун ҳам меҳнат қилдинг», — деди Трамп маросимда. Шу билан бирга, у Маскни «жаҳон тарихидаги энг буюк бизнес етакчиларидан бири» сифатида таърифлади.
Маск ўз навбатида сиёсий саҳнадан кетса-да, керак бўлганда маслаҳат беришни давом эттиришини маълум қилди. Трамп эса уни «ишончли дўст ва маслаҳатчи» сифатида кўришда давом этишини айтди.
Маск давлат хизматидан кетгандан сўнг ўз бизнес лойиҳаларига тўлиқ эътибор қаратиши режалаштирилмоқда.