Партия етакчиси Костадин Костадинов ўз нутқида Европадаги ҳамкорларга мурожаат қилиб, «ўтирган шохларини чопмасликни» сўради. Унинг таъкидлашича, бир қатор иқтисодчилар ва мутахассислар Болгариянинг еврозонага қўшилиши манфаатли бўлишига шубҳа билдирмоқда.
Костадинов 4 июл куни яна оммавий чиқиш уюштиришга чақирди. У куни Болгария парламентига ЕИ делегацияси ташрифи режалаштирилган. Намойишчилар ушбу ташрифни блоклаш орқали ўз эътирозларини янада кучайтиришни мақсад қилган.
Болгария 2007 йилда Европа Иттифоқига аъзо бўлган. Бироқ Европа Марказий банкининг баҳолашича, мамлакат еврога ўтиш учун талаб этиладиган барча мезонларга ҳали жавоб бермайди. Шунга қарамай, 2024 йилда парламент валюта алмашувига доир ўтиш қонунини қабул қилган. Жараённинг якуний санаси ҳозирча аниқ эмас.
Норозиликлар фонида президент Румен Радев референдум ўтказиш таклифи билан чиқди. Аммо парламент бу ташаббусни рад этди ва уни Европа Иттифоқи билан интеграцияга тўсиқ қўяётганликда айблади.