«Пари Сен-Жермен» клуби илк бор УЕФА Чемпионлар Лигасини ютиб, Францияда оммавий хурсандчиликка сабаб бўлди. Бироқ байрамлар ортидан мамлакатнинг турли шаҳарларида нохуш ҳолатлар ҳам юз берди.
Париж, Лион, Марсел ва бошқа шаҳарларда минглаб мухлислар кўчаларга чиқиб ғалабани нишонлади. Бироқ байрам ўрнига баъзи жойларда тартибсизликлар, ёниб кетган автомобиллар ва тўқнашувлар кузатилди. Полиция маълумотига кўра, 250 дан ортиқ киши ушланган.
Франция Ички ишлар вазирлиги тарқатган маълумотга кўра полиция ва намойишчилар ўртасидаги тўқнашувлар чоғида икки киши ҳалок бўлган. Ҳалок бўлганлардан бири Марселда полициядан қочиш чоғида автомашинаси билан йўлдан чиқиб кетган, иккинчиси эса Парижда намойиш пайти ҳалок бўлгани айтилмоқда.
Жамоат тартибини сақлаш учун мамлакат бўйлаб минглаб полициячи жалб қилинди. Ижтимоий тармоқларда тарқалган видеоларда полициянинг резина калтак ва кўзни ёшлатувчи газ қўллаётгани акс этган.
Франция ҳукумати келгусида бундай байрамлар хавфсизлигига алоҳида эътибор қаратилишини маълум қилди. ПСЖ ғалабаси тарихий воқеа сифатида қайд этилган бўлса-да, унинг оқибатлари жамоатчиликда жиддий баҳсларга сабаб бўлди.