2 июн куни Ҳиндистон ҳарбийлари Мянманинг Сагаин ҳудудида жойлашган исёнчиларга қарши операция ўтказди. Ҳужум вақтида ҳаво зарбалари ҳамда артиллериядан фойдаланилган. Маҳаллий аҳолининг маълум қилишича, ҳодиса пайтида кучли портлашлар ва ўқ узиш овозлари эшитилган.
Ҳужумга дучор бўлган ҳудуддаги гуруҳлар Ҳиндистонга қарши кураш олиб бораётган этник манипури гуруҳлари экани айтилмоқда. Улар сўнгги ҳафталарда Мянма ҳудудидан туриб Ҳиндистон томонига бир неча марта ҳужум қилгани ҳақида хабарлар тарқалган.
Ал Жазирага интервю берган маҳаллий фуқаролар хавфсизлик ҳолатидан қаттиқ хавотирда эканликларини билдирди. «Ҳар куни портлашлар, ҳар куни ўқ овозлари. Биз ўз уйимизда ҳам ўзимизни хавфсиз ҳис қилмаяпмиз», — дейди Сагаиндаги аҳолидан бири.
Ҳужумдан сўнг ҳудудда юзлаб киши ўз уйини тарк этиб, хавфсизроқ жойларга кўчиб ўтишга мажбур бўлди. Маҳаллий манбаларга кўра, баъзи мактаблар вақтинча ёпилган.
Мянма расмийлари бу масалада ҳали расмий баёнот бермаган. Ҳиндистон ҳукумати эса ўз навбатида ҳужум мамлакат хавфсизлигини таъминлаш мақсадида амалга оширилганини таъкидламоқда.