Миллий статистика қўмитаси маълумотларига кўра, 2025 йилнинг январь-март ойлари мобайнида Ўзбекистонда кичик тадбиркорлик субъектлари томонидан 145,8 трлн сўмлик қўшилган қиймат яратилган. Бу мамлакат ялпи ички маҳсулотининг 45,6 фоизини ташкил этмоқда.
Иқтисодиётнинг турли соҳалари бўйича кичик тадбиркорликнинг ҳиссаси ҳар хил. Масалан, қишлоқ, ўрмон ва балиқчилик хўжалигида бу кўрсаткич 96 фоизга етган. Қурилиш соҳасида кичик тадбиркорлар улуши 79,9 фоизни, хизмат кўрсатиш соҳасида эса 44,8 фоизни ташкил этган.
Саноат соҳасида кичик тадбиркорлик субъектлари томонидан яратилган қўшилган қийматнинг улуши 21,9 фоизни ташкил қилган. Бу кўрсаткич соҳанинг катта қисми ҳали ҳам йирик корхоналар ҳиссасига тўғри келаётганини кўрсатади.
Мамлакатда кичик тадбиркорликни қўллаб-қувватлашга қаратилган ислоҳотлар туфайли мазкур соҳа иқтисодиётда барқарор ўрин эгаллаб бормоқда. Кичик бизнес фаолият юритадиган тармоқларда иш ўринлари яратиш, рақобатни кучайтириш ва маҳаллий бозорни барқарорлаштиришга хизмат қилмоқда.
Ушбу кўрсаткичлар кичик тадбиркорлик сектори мамлакат иқтисодиётидаги стратегик аҳамиятга эга бўлиб бораётганини яна бир бор тасдиқлайди.