Россия томонидан тайинланган маъмурлар маълум қилишича, дрон ҳужумлари Жанубий Украинанинг ишғол қилинган Запорожье ва Херсон областларига уюштирилган. 2022 йил сентябрда Москва бу ҳудудларни Донецк ва Луганск билан бирга аннексия қилганини эълон қилган эди.
Запорожье областининг ишғол қилинган қисмларида Кремль тайинлаган губернатор Евгений Балицкийнинг маълум қилишича, душанба куни кечқурун бутун ҳудуд электр таъминотисиз қолган. Сешанба тонгига келиб, 457 та аҳоли пунктида яшовчи 600 мингдан зиёд одамда ҳамон свет йўқ эди.
Қўшни Херсон вилоятида Россия тайинлаган губернатор Владимир Салдонинг айтишича, у ерда ҳам 150 дан ортиқ аҳоли пунктида 104 минг киши электр таъминотисиз қолган.
Салдо Телеграмда ёзганига кўра, дронлар парчалари Херсоннинг Геническ туманидаги янги электр подстанциясини ва Запорожьенинг Мелитополь туманидаги яна бир подстанцияни зарарлаган. У ёниб турган подстанция суратини ҳам баҳам кўрган.
Ҳар икки амалдорнинг таъкидлашича, сув таъминоти каби муҳим инфратузилма объектлари захира генераторларга уланган. Ёнғинлар ўчирилган ёки ўчириш ишлари якунига етаётган, электр таъминотини тиклаш ишлари бошланган.
Украина расмийлари бу ҳужумлар юзасидан ҳозирча расмий изоҳ бермаган.